ကပ်ဘေးကာလ အပစ်ရပ်ကြေညာထားတဲ့ တပ်နဲ့ TNLA တိုက်ပွဲဖြစ်

ကံသာ
2020-05-29
အီးမေးလ်
မှတ်ချက်ပေးပါ
Share
ပုံနှိပ်ပါ

ရှမ်းပြည်နယ်၊ ကွတ်ခိုင်မြို့မှာ နမ့်ကွတ်ရွာအနီးမှာ တပ်မတော်နဲ့ TNLA တို့ ဒီမနက်က တိုက်ပွဲဖြစ်လို့ ပြည်ထောင်စုလမ်းမကြီးမှာ ခရီးသွားကားတွေ ယာယီ ပိတ်မိခဲ့ပါတယ်။

ကွတ်ခိုင်-နမ့်ဖတ်ကာကြားက နမ့်ကွတ်ရွာနဲ့ ရှုခင်းသာ အတက်နေရာတစ်ဝိုက်မှာ တပ်မတော်နဲ့ တအာင်း အမျိုးသား လွတ်မြောက်ရေးတပ်မတော် TNLA တို့ ဒီမနက်က တိုက်ပွဲဖြစ်ပွားခဲ့ပါတယ်။

မူဆယ်မြို့ကနေ ဆင်းလာတဲ့ တပ်မတော်ယာဉ်တန်းတွေ နမ့်ကွတ်ရွာနားကို ဖြတ်သန်းပြီးချိန် တိုက်ပွဲစတင် ဖြစ်ခဲ့တာလို့ ဒေသခံက ပြောပါတယ်။ နမ့်ကွတ်ရွာအနီး လေးနေရာလောက်မှာ မနက် ဆယ်နာရီကျော် ကနေ တိုက်ပွဲစတင်ဖြစ်ခဲ့ပြီး ညနေ သုံးနာရီအထိ ပစ်ခတ်သံတွေကြားနေရလို့ ခရီးသွားကားတွေ မသွားရဲဘဲ ဖြစ်ခဲ့တယ် လို့ ဒေသခံတစ်ဦးက RFA ကို ပြောပါတယ်။

တအာင်းအမျိုးသား လွတ်မြောက်ရေးတပ်မတော် TNLA ပြန်ကြားရေးအရာရှိ ဗိုလ်မှူး မိုင်းအိုက်ကျော်က သူတို့စစ်ကြောင်းတွေ ကားလမ်းဖြတ်သန်းချိန်မှာ တပ်မတော်စစ်ကြောင်းနဲ့တိုးလို့ တိုက်ပွဲဖြစ်ခဲ့တာလို့ ပြောပါတယ်။

တိုက်ပွဲအတွင်း တပ်မတော်စစ်ကားတစ်စီး ပျက်စီးသလို လက်နက်ခဲယမ်းတချို့ သိမ်းဆည်းရမိတယ်လို့ TNLA က ပြောပါတယ်။

တပ်မတော် သတင်းမှန်ပြန်ကြားရေးအဖွဲ့ ဗိုလ်မှူးချုပ် ဇော်မင်းထွန်းကတော့ တပ်မတော် စစ်ကြောင်းကားတွေ နမ့်ကွတ်ရွာအနီးမှာ မိုင်းခွဲ တိုက်ခိုက်ခံရတာဖြစ်ပြီး စစ်ကား အနည်းငယ် ပျက်စီးတယ်လို့ ပြောပါတယ်။

ဒီညနေပိုင်းအထိ တပ်မတော်က နမ့်ကွတ်နဲ့ ရှုခင်းသာတစ်ဝိုက်မှာ နယ်မြေရှင်းလင်းနေတယ်လို့ ဆိုပါတယ်။ ဒေသခံတွေနဲ့ ခရီးသွားတွေကတော့ ညနေပိုင်းအထိ နမ့်ကွတ်ရွာတစ်ဝိုက် လက်နက်ကြီး လက်နက်ငယ် ပစ်ခတ်သံတွေကို ကြားနေရပြီး မူဆယ်ကနေ ဆင်းလာတဲ့ ခရီးသွားကားတွေ နီးစပ်ရာအိမ်တွေမှာ နားနေရသလို ကွတ်ခိုင်တိုးဂိတ်မှာလည်း နေ့လယ်ပိုင်းအထိ ခရီးသွားကားတွေ ရပ်တန့်စောင့်ဆိုင်းခဲ့ရတယ်လို့ ပြောပါတယ်။ ဒီညနေပိုင်းမှာ ကားတွေ သွားလာလို့ရနေပေမယ့် သေနတ်သံတွေ ကြားနေရဆဲဖြစ်လို့ သတိထားပြီး ဖြတ်သန်းနေကြပါတယ်။

ကွတ်ခိုင်နဲ့ နမ့်ဖတ်ကာကြားမှာ ၂၀၁၉ သြဂုတ်လအတွင်း တပ်မတော်နဲ့ TNLA တိုက်ပွဲကြောင့် အရပ်သားတွေ သေဆုံး ထိခိုက်ဒဏ်ရာရတာ၊ ခရီးသွားကားတချို့ မီးရှို့ခံရတာအပြင် ထောင်နဲ့ချီတဲ့ဒေသခံတွေ ကွတ်ခိုင်မြို့ပေါ်ကို နေရပ်စွန့်ခွာခဲ့ရပြီး မူဆယ် -မန္တလေး လမ်းပိုင်း တစ်လနီးပါး ပိတ်ဆို့မှုဖြစ်ခဲ့ပါတယ်။

အဲဒီကာလက တိုက်ပွဲပြင်းထန်တဲ့အတွက် လမ်းပိတ်ဆို့မှုဖြစ်လို့ ကွတ်ခိုင်နဲ့ နမ့်ဖတ်ကာကြားက ကျေးရွာတွေ စားနပ်ရိက္ခာ ပြတ်တောက်ခဲ့ပါတယ်။

လက်ရှိမှာ ကိုရိုနာဗိုင်းရပ်စ် တိုက်ဖျက်ရေးကာလကြောင့် TNLA ဘက်က မေလကုန်အထိ အပစ်ရပ်ကာလ သတ်မှတ်ထားသလို တပ်မတော်ဘက်ကလည်း  ရခိုင်ဒေသကလွဲပြီး ကျန်တဲ့ဒေသတွေမှာ အပစ်ရပ်ထားမယ်လို့ ထုတ်ပြန်ထားတာပါ။ ဒီလို ထုတ်ပြန်ထားတဲ့ကြားကပဲ ဒီကနေ့ တိုက်ပွဲ ဖြစ်ခဲ့တာပါ။

ဒေသခံတွေကတော့ ကိုရိုနာရောဂါကာလမှာ ကွတ်ခိုင်ဒေသအတွင်း မနှစ်ကလို တိုက်ပွဲတွေ မဖြစ်အောင် သက်ဆိုင်ရာအဖွဲ့တွေ ထိန်းသိမ်းဆောင်ရွက်ပေးစေချင်တယ်လို့ ပြောကြပါတယ်။

ကွန်မင့်များ (0)
Share
ဆိုက်တခုလုံးသို့