AA ပြောခွင့်ရှိသူနဲ့ မေးမြန်းချက်ကြောင့် VOM သတင်းဌာနတည်ထောင်သူ ဖမ်းဆီးခံရ

ခေမဏီဝင်း
2020-03-31
အီးမေးလ်
မှတ်ချက်ပေးပါ
Share
ပုံနှိပ်ပါ

မန္တလေးတိုင်း သတင်းရဲတပ်ဖွဲ့က ဒုဲရဲမှူး ခင်မောင်ဝင်း က တရားလိုလုပ်ပြီး အမှုဖွင့်တာလို့ ချမ်းမြသာစည်မြို့နယ် သတင်းပြန်ကြားရေးအရာရှိ မြို့နယ်တရားသူကြီး ဦးကျော်စွာလင်းက ပြောပါတယ်။

"သတင်းဌာနမှာ အေအေက ခိုင်သုခနဲ့ ဆက်သွယ်ပြီး အေအေကို အကြမ်းဖက်အဖြစ်ကြေညာခဲ့ခြင်း၊ မြောက်ပိုင်း မဟာမိတ်အဖွဲ့တွေကနေ အေအေမပါဝင်ဘဲ ပဏာမ အပစ်ခတ်ရပ်စဲရေးရေးထိုးနိုင်တဲ့ ဆွေးနွေးပွဲတွေကို တွေ့ဆုံ ဆွေးနွေးတာ မဖြစ်နိုင်ကြောင်း ထုတ်လွှင့်ခဲ့တယ်"

မတ် ၂၃ ရက်နေ့က အကြမ်းဖက်အဖွဲ့အဖြစ် အစိုးရက သတ်မှတ်ကြေညာလိုက်တဲ့ ရက္ခိုင့်တပ်တော် AA ရဲ့ ပြောရေးဆိုခွင့်ရှိသူကို VOM ရဲ့ ရခိုင်ဒေသအခြေစိုက် သတင်းထောက် ခိုင်လင်းစံ က ဆက်သွယ်မေးမြန်း ထားတာကို VOM သတင်းဌာနစာမျက်နှာမှာ မတ် ၂၇ ရက်နေ့က ဖော်ပြခဲ့တာဖြစ်ပါတယ်။

အဲဒီလိုဖော်ပြပြီး သုံးရက်အကြာမှာတော့ သတင်းဌာနတည်ထောင်သူလည်းဖြစ်၊ အယ်ဒီတာချုပ်လည်းဖြစ်တဲ့ ကိုနေမျိုးလင်းကို အကြမ်းဖက်တိုက်ဖျက်ရေးဥပဒေပုဒ်မ ၅၀ (က) ၊ ၅၂ (က) တို့နဲ့ အမှုဖွင့်လိုက်တာပါ။

အဲဒီပုဒ်မတွေဟာ အကြမ်းဖက်အုပ်စုတစ်ခုခုမှာသိလျက်နဲ့ ပါဝင်ဆောင်ရွက်တာ၊ အကြမ်းဖက်သမားကိုဖြစ်စေ၊ အကြမ်းဖက်အုပ်စုတစ်ခုခုရဲ့ အဖွဲ့ဝင်ကိုဖြစ်စေ အဆောက်အအုံနဲ့ နေရာတစ်ခုခု အသုံးပြုခွင့်၊ စုဝေးခွင့်၊ အစည်း အဝေးပြုလုပ်ခွင့် စတာတွေကို စီစဉ်ပေးရင် အရေးယူခံရနိုင်တာဖြစ်ပါတယ်။

ပုဒ်မ ၅၀ (က) အရ ထောင်ဒဏ် ၁၀ နှစ်ကနေ တစ်သက်တစ်ကျွန်းထိချမှတ်နိုင်ပြီး ပုဒ်မ ၅၂ (က) ကတော့ ထောင်ဒဏ် အနည်းဆုံးသုံးနှစ်ကနေ အများဆုံး ခုနှစ်နှစ်ထိ ချမှတ်ခံရနိုင်တဲ့ ပုဒ်မတွေဖြစ်ပါတယ်။

မတ် ၃၀ မနေ့ညက နေအိမ်ကနေ ဖမ်းဆီးခေါ်ဆောင်ခံခဲ့ရတဲ့ ကိုနေမျိုးလင်းကို ချမ်းမြသာစည်မြို့နယ် တရားရုံးမှာ ဒီနေ့ မတ် ၃၁ ရက်နေ့မှာ ရုံးထုတ်ခဲ့ပါတယ်။

သူ့အနေနဲ့ သတင်းမီဒီယာကျင့်ဝတ်နဲ့အညီသာ ရေးသားဖော်ပြခဲ့တယ်လို့ ကိုနေမျိုးလင်း က ပြောပါတယ်။

"အေအေ ခိုင်သုခ အင်တာဗျူးကို တင်လို့ပါ၊ ဒါက ကျင့်ဝတ်နဲ့အညီရေးထားတာပါ၊ ဒါတွေကို  မီဒီယာကောင်စီ လူကြီးတွေနဲ့ စစ်ပြီးတော့ ကျင့်ဝတ်ချိုးဖောက်တယ်ဆိုရင် ကြိုက်တဲ့အပြစ်ဒဏ်ခံနိုင်ပါတယ်"

AA ပြောခွင့်ရသူ ခိုင်သုခကို မေးမြန်းထားတာက အကြမ်းဖက်အဖွဲ့အဖြစ် ကြေညာခံခဲ့ရတာနဲ့ ပတ်သက်လို့ သဘောထား၊ AA အဖွဲ့ မပါရင် မြောက်ပိုင်းမဟာမိတ်အဖွဲ့တွေနဲ့ အစိုးရ အပစ်အခတ်ရပ်ဆိုင်းရေး ဆွေးနွေးပွဲ အခြေအနေအပေါ် သဘောထားနဲ့ အခုလို အကြမ်းဖက်အဖွဲ့အဖြစ် သတ်မှတ်ခံလိုက်ရတဲ့အတွက် ငြိမ်းချမ်းရေး ဆွေးနွေးပွဲမှာ ဘယ်လိုသဘောဆောင်သွားလဲဆိုတဲ့ မေးခွန်းတွေ ဖြစ်ပါတယ်။

ကိုနေမျိုးလင်းရဲ့ ဇနီးဖြစ်သူ မဇာနည်မာန်က "သတင်းမီဒီယာကိစ္စနဲ့ဆိုင်နေလို့ မီဒီယာကောင်စီကို တိုက်တွန်း ထားတယ်။ တမင်သက်သက် နောက်ကနေ လုပ်သွားတယ်လို့မြင်တယ်။ ရောဂါပြန့်နှံ့နေလို့ တရားရုံးတွေတောင် တရားမရုံးချိန်းတွေ ပိတ်ထားတယ်။ သတင်းလွတ်လပ်ခွင့်ကလည်း ဆိုးရွားလွန်းမက ဆိုးရွားလွန်းနေတယ်လို့ ပြောချင်တယ်"

သတင်းသမားတစ်ယောက်ကို အခုလိုဖမ်းဆီးအမှုဖွင့်တဲ့အပေါ် သတင်းမီဒီယာကောင်စီအနေနဲ့ လက်သင့် မခံကြောင်း ကောင်စီရဲ့ အထွေထွေအတွင်းရေးမှူး ဦးကျော်စွာမင်းက ပြောပါတယ်။

"တပ်မတော်ကိုလည်း ဒါနဲ့ပတ်သက်ပြီး ဆက်သွယ်မေးမြန်းတဲ့အခါမှာ ပြည်ထဲရေးက တိုက်ရိုက်ဆောင်ရွက် တာဖြစ်လို့ တပ်မတော်က ပါဝင်ပတ်သတ်ခြင်းမရှိဘူးဆိုပြီး ပြောတယ်။ ကျေနပ်မှု့မရှိရင် ကောင်စီကို ဦးစွာ တိုင်ကြားဖို့ဆိုတာ အမြဲပြောလေ့ရှိပါတယ် ။ ဒါကို သတင်းသမားတွေကို လိုရာစွဲသုံးလို့ရတဲ့ ဥပဒေနဲ့အရေးယူတာ ကိုတော့ ကောင်စီအနေနဲ့ လက်သင့်မခံပါဘူး"

ပြည်ထဲရေးဝန်ကြီးဌာန အထူးစုံစမ်းစစ်ဆေးရေးဦးစီးဌာန ညွှန်ကြားရေးမှူး ဦးမျိုးခိုင်ဆွေကတော့ VOM အယ်ဒီတာချုပ် ကိုနေမျိုးလင်းကို ပုဒ်မနှစ်ခုနဲ့ အမှုဖွင့်ထားတာ မှန်ကန်တယ်လို့ ပြောပါတယ်။

အထက်မြန်မာနိုင်ငံသတင်းသမားများအဖွဲ့ UMJO က အဖွဲ့ဝင် ကိုမြတ်ကလေးက ဒီလိုတရားစွဲဆိုမှုဟာ ခေတ်နောက်ပြန်စွဲနေသလားလို့ မေးခွန်းထုတ်ပါတယ်။

“မီဒီယာကောင်စီကို အကြောင်းကြားပြီးမှလုပ်ရမယ်ဆိုတာ ဥပမာလည်းရှိပါတယ်။ အခုက ခဏလေးဆိုပြီး ခေါ်သွားတယ်၊ မနက်ကျမှ ရမန်ယူတယ်ဆိုတော့ စစ်အာဏာရှင်တုံးက ပုံစံအတိုင်းသွားနေသလားလို့ မြင်မိတယ်”

မှုခင်းတပ်ဖွဲ့က VOM ရုံးခန်းကို ဝင်ရောက်ရှာဖွေပြီး ရခိုင်အခြေစိုက်သတင်းထောက်ပေးပို့ခဲ့တဲ့ အီးမေးတွေကို စစ်ဆေးကာ လုပ်ငန်းခွင်မှာအသုံးပြုခဲ့တဲ့ ကွန်ပြူတာကို သိမ်းဆည်းသွားတယ်လို့ မဇာနည်မာန်က ပြောပါတယ်။

ကိုနေမျိုးလင်းကို လာမယ့် ဧပြီ ၉ ရက်နေ့မှာ ထပ်မံရုံးထုတ်မှာဖြစ်ပါတယ်။

ဆိုက်တခုလုံးသို့