လှိုင်သာယာစက်ရုံ အတည်ပြုလူနာနဲ့ ထိတွေ့ခဲ့သူတွေမှာ ရောဂါပိုးမတွေ့ရ

ကျော်လွင်ဦး
2020-04-26
အီးမေးလ်
မှတ်ချက်ပေးပါ
Share
ပုံနှိပ်ပါ

ရန်ကုန်တိုင်း၊ လှိုင်သာယာမြို့နယ်၊ အနော်ရထာစက်မှုဇုန်မှာရှိတဲ့ ချန်းရိဖိနပ်စက်ရုံက ကိုရိုနာဗိုင်းရပ်စ်ပိုးတွေ့ရှိတဲ့ တရုတ်စကားပြန်နဲ့ အနီးကပ် ထိတွေခဲ့သူ ရှစ်ဦးကို စစ်ဆေးရာမှာ ရောဂါပိုးမတွေ့ဘူးလို့ ရန်ကုန်တိုင်းအစိုးရအဖွဲ့ က ပြောပါတယ်။

ကျန်ရှိတဲ့အလုပ်သမားတွေနဲ့ ပတ်သက်ပြီး ကျန်းမာရေးဝန်ကြီးဌာန ညွှန်ကြားချက်ကိုစောင့်နေတယ်လို့ ရန်ကုန်တိုင်းအစိုးရအဖွဲ့  အလုပ်သမားဝန်ကြီး ဒေါ်မိုးမိုးစုကြည်က RFA ကို ပြောပါတယ်။

“ ကျန်းမာရေး အဖြေပေါ်မှာမူတည်ပြီးတော့ ပြည်ထောင်စုရဲ့ ညွှန်ကြားချက်တွေအညီ အမတို့ သွားမှာဖြစ်ပါတယ်၊ အားလုံးကို Lock down လုပ်ဖို့၊ အားလုံးကို quarantine လုပ်ဖို့ အခြေအနေအားလုံးသည် ကျန်းမာရေးက ထွက်ပေါ်လာတဲ့ အဖြေပေါ်ကနေ သွားမှာဖြစ်ပါတယ်၊ ခုလောလောဆယ်ဆိုရင်လည်း case ၁၄၄နဲ့ ထိစပ်တဲ့သူ ရှစ်ယောက်စလုံးဟာ ကျန်းမာရေးစစ်ဆေးချက်တွေအရ ပိုးမတွေရပါဘူး၊ ”

အဲဒီ ပိုးတွေ့လူနာနဲ့ တစ်ဆောင်ထဲနေတဲ့ စက်ပြင်ဆရာတွေ အပါအဝင် လူ ၃၇ ယောက်ကိုတော့ အစိုးရကစီစဉ်တဲ့ Quarantine နေရာတွေမှာ ထားပြီး စစ်ဆေးနေတယ်လို့လည်း ဒေါ်မိုးမိုးစုကြည်က ပြောပါတယ်။

Quarantine ဝင်တဲ့ အလုပ်သမားတွေကို စားသောက်ဖို့အတွက် အစိုးရက မစီစဉ်ပေးဘဲ တစ်ရက်ကို အစားအသောက်စရိတ် ကျပ်ငါးထောင် ပေးရတယ်လို့လည်း အလုပ်သမားတွေက ပြောပါတယ်။ အဲဒီထဲက မြန်မာနိုင်ငံလုံးဆိုင်ရာ အလုပ်သမားသမဂ္ဂများအဖွဲ့ချုပ် CTUM အဖွဲ့ဝင်အလုပ်သမားတွေကိုတော့ အဖွဲ့က ကူညီပံ့ပိုးပေးတယ်လို့ သိရပါတယ်။

ကျန်တဲ့ အလုပ်သမားတွေလည်း Quarantine ဝင်မယ်ဆိုရင် အလုပ်သမားတွေဟာ တရက်လုပ်ခလစာ ကျပ် ၄၈၀၀ ဘဲရရှိတဲ့ အလုပ်သမားတွေက တစ်ရက် ငါးထောင် ပေးရမှာတွေ ဖြစ်လာနိုင်တာကြောင့် အခက်အခဲဖြစ်နိုင်တယ်လို့ အလုပ်သမားတွေက ပြောပါတယ်။

ကျန်းမာရေးနဲ့ အားကစားဝန်ကြီးဌာနက ပြီးခဲ့တဲ့ ဧပြီ ၂၄ ရက်နေ့ညမှာ ထုတ်ပြန်တဲ့ လူနာအမှတ် ၁၄၄ ဟာ လှိုင်သာယာမြို့နယ် အနော်ရထာ စက်မှုဇုန်မှာရှိတဲ့ ချန်းရိဖိနပ်စက်ရုံက မြန်မာနိုင်ငံသား တရုတ်စကားပြန် အမျိုးသားလို့ ထုတ်ပြန်ပြီးနောက် မနေ့က နေလည်ပိုင်းမှာ စက်ရုံကို ပိတ်လိုက်တာပါ။

မနေ့တုန်းက အလုပ်ဆင်းခဲ့တဲ့လူတွေ အတော်တော်များကတော့ အဆောင်တွေပြန်ရာမှာ အပြင်ထွက်သွားလာခွင့် ကန့်သတ်ခံရတာတွေရှိသလို တစ်ချို့ကျေးရွာတွေမှာ ရွာထဲအဝင်မခံဘဲ စာသင်ကျောင်းတွေမှာ Quarantine ဝင်ရတာတွေရှိပါတယ်။

တွံတေးမြို့နယ် တမံကြီးကျေးရွာကနေ ချန်းရိဖိနပ်စက်ရုံမှာ အလုပ်ဆင်းနေတဲ့ အလုပ်သမား ၃၀၀ နီးပါးရှိပြီး အဲဒီထဲက မနေ့က အလုပ်ဆင်းတဲ့ အလုပ်သမား ၅၀ ကျော်ဟာ ကျေးရွာစာသင်ကျောင်းမှာဘဲ နေရတယ်လို့ ကိုလျှမ်းထက်က ပြောပါတယ်။

“ အခုကျနော်တို့ နေတဲ့ရွာမှာပေါ့နော် လူကြီးတွေက ရွာထဲဝင်ရင်တောင်မှ အဲလိုမျိုး ကိုယ်အိမ်မှာကို နေလို့အဆင်မပြေဘူးပေါ့နော်၊ နေမယ်ဆိုရင်လည်း နေလို့ရတယ်တဲ့ ဒါပေမဲ့ မိသားစုတွေ အကုန်အပြင်မထွက်ရဘူးဆိုလို့ ကျနော်တို့က မိသားစုငဲ့ပြီး စာသင်ကျောင်းမှာဘဲ လာနေကြတာ၊ လောလောဆယ် အလုပ်ပြန်ဖွင့်လည်း ဆင်းဖို့ကအဆင်မပြေသေးဘူး”

လှိုင်သာယာမြို့နယ်က ချန်းရိအလုပ်သမားတွေရှိတဲ့ အဆောင်တွေကိုလည်း ကန့်သတ်စောင့်ကြည့်တာတွေ ပြုလုပ်နေပါတယ်။

ချိန်းရိစက်ရုံက အလုပ်သမားတွေနဲ့ အလုပ်သမားအရေး ဆောင်ရွက်သူတွေကတော့ ၂၁ ရက်လောက်ပိတ်ပေးဖို့ တောင်းဆိုနေကြပါတယ

ပိတ်ထားတဲ့ကာလမှာ လူမှုဖူလုံရေး ဥပဒေမှာပါတဲ့အတိုင်း အစိုးရနဲ့ အလုပ်ရှင်က လစာပေးစေလိုတယ်လို့ မြန်မာနိုင်ငံလုံးဆိုင်ရာ အလုပ်သမားသမဂ္ဂများအဖွဲ့ချုပ် CTUM အဖွဲ့ဝင် ကိုမျိုးဇော်က ပြောပါတယ်။

“ ချန်းရီဆိုလို့ရှိရင် ဘာဖြစ်ဖြစ် စောင့်ကြည်ကာလကို ၂၁ရက်ပိတ်ထားသင့်တယ်၊ ပိတ်ထားတဲ့အခါမှာလည်း ကျနော်တို့က အလုပ်ရှင်က ၄၀ရာခိုင်နှုန်း ကျခံတယ်၊အစိုးရက ၆၀ရာခိုင်နှုန်း ကျခံတဲ့ လူမှုဖူလုံရေးကနေ ဆေးခွင့်အနေအထားမျိုး ပေးပြီးတော့ စောင့်ကြည်တာမျိုး လုပ်မယ်ဆိုရင် အလုပ်သမားတွေအတွက် အဆင်ပြေနိုင်တယ်၊ ဘာမှမဖြစ်ပါဘူးဆိုပြီး စက်ရုံကို ဖွင့်လိုက်မယ်ဆိုရင်တော့ ဘယ်အချိန်မှ ပေါ်လာမှန်းမသိတဲ့ ရောဂါကြောင့် ကျနော်တို့ ပြည်သူတွေ ဒုက္ခရောက်နိုင်တယ် ဒါကြောင့်မို့ကျနော်တို့က လောလောဆယ်တော့ ချန်းရီစက်ရုံကို ပိတ်ထားစေချင်တယ်”

ရန်ကုန်တိုင်း အလုပ်သမားဝန်ကြီး ဒေါ်မိုးမိုးစုကြည်ကတော့ အလုပ်သမားတွေ အလုပ်ပိတ်ရက် လုပ်ခလစာကို ဥပဒေအညီဆောင်ရွက်ပေးသွားမယ်လို့ ပြောပါတယ်။

တရုတ်နိုင်ငံသားပိုင် ချန်းရိဖိနပ်စက်ရုံဟာ Adidas တံဆိပ်ဖိနပ်တွေကို ချုပ်လုပ်နေတာဖြစ်ပြီး စက်ရုံ ဖွင့်လှစ်ခဲ့တာ ခြောက်နှစ်လောက်ရှိပြီလို့ ဆိုပါတယ်။


ကျန်းမာရေးနဲ့ အားကစားဝန်ကြီးဌာနက စက်ရုံအလုပ်ရုံတွေကို ယာယီ ပိတ်ထားဖို့နဲ့ သက်ဆိုင်ရာက စစ်ဆေးတာတွေ လုပ်ဆောင်ပြီးမှ ဖွင့်လှစ်ခွင့်ပြုမယ်လို့ ထုတ်ပြန်ထားပါတယ်။

သင်္ကြန်ကာလ ရုံးပိတ်ရက်အလွန်မှာ ချန်းရိဖိနပ်စက်ရုံကို သက်ဆိုင်ရာက စစ်ဆေးပြီး ပြန်လည်ဖွင့်ခွင့် ပေးထားတဲ့အတွက် စက်ရုံ ပြန်ဖွင့်တဲ့နေ့မှာပဲ အလုပ်သမားတစ်ဦး ဗိုင်းရပ်စ် ကူးစက်ခံထားရကြောင်း သိရတာဖြစ်ပါတယ်။ အဲဒီစက်ရုံကို မနေ့နေ့လည်ကစပြီး ပြန်လည်ပိတ်ထားပါတယ်။

ကွန်မင့်များ (0)
Share
ဆိုက်တခုလုံးသို့