ပလက်ဝနယ်က ကိုယ်ဝန်ဆောင် အမျိုးသမီးနဲ့ အရပ်သား လေးဦးပျောက်ဆုံး

2019-10-09
အီးမေးလ်
မှတ်ချက်ပေးပါ
Share
ပုံနှိပ်ပါ
ချင်းပြည်နယ် ပလက်ဝမြို့နယ်က တိုက်ပွဲရှောင်ဒုက္ခသည်များ။
ချင်းပြည်နယ် ပလက်ဝမြို့နယ်က တိုက်ပွဲရှောင်ဒုက္ခသည်များ။
ဓာတ်ပုံ - ပလက်ဝမြို့နယ်လူမှု့ကူညီရေးပရဟိတအဖွ့ဲ

ချင်းပြည်နယ်တောင်ပိုင်း ပလက်ဝမြို့နယ်မှာ ပြီးခဲ့တဲ့ စက်တင်ဘာလကတည်းက ကိုယ်ဝန်ဆောင်အမျိုးသမီးတစ်ဦး အပါအဝင် အရပ်သား ငါးဦး ပျောက်ဆုံးနေတယ်လို့ ချင်းလူ့အခွင့်ရေးအဖွဲ့က ဒီနေ့ထုတ်ပြန်လိုက်ပါတယ်။

အောက်တိုဘာလ အစောပိုင်းတုန်းက သာယာကုန်းကျေးရွာသား ဦးကူးဟွေးဟာ တောင်ယာသွားပြီး နေအိမ် ပြန်မရောက်တာကြောင့် ကိုယ်ဝန် ၆ လ လွယ်ထားတဲ့ သူ့အမျိုးသမီးက ယောကျ်ားဖြစ်သူကို တောထဲ လိုက်ရှာရင်း ပျောက်ဆုံးနေတာဖြစ်တယ်လို့ ချင်းလူ့အခွင့်ရေးအဖွဲ့ပြောရေးဆိုခွင့်ရှိသူ ဆလိုင်းတေရကပြောပါတယ်။

"သာယာကုန်းရွာသား ဦးကူးဟွေး တောင်ယာသွားစဉ်မှာ ပျောက်သွားလို့ သူ့ဇနီးသည်က တောင်ယာမှာလိုက်ရှာတာ။ အဲမှာ သူဇနီးပါပျောက်သွားတယ်၊ နှစ်ယောက်စလုံး ပျောက်သွားတယ် သူ့ဇနီးက ကိုယ်ဝန် ၆ လလွယ်ထားတာ၊ ၇ ရက်နေ့မှာ ရွာသားတွေက သူတို့ပျောက်သွားတဲ့နေရာတဝိုက်မှာ သွားရှာကြတာ ဘာမှမတွေကြလို့ပြန်လာကြတာ"

ပလက်ဝမြို့နယ်ရဲ့ မြောက်ဘက် အနည်းဆုံးမိုင် ၃၀ ဝန်းကျင်ဝေးတဲ့ ခမောင်းဝကျေးရွာမှာ တပ်မတော်စစ်ဗျူဟာ ကုန်းထိုင်ထားတာရှိပြီးတော့၊ အိမ်နီးနားချင်းကျေးရွာတွေဖြစ်တဲ့ သာယာကုန်း၊ ကင်းတလင်း၊ ကျွန်းချောင်း၀ စတဲ့ ကျေးရွာတွေရှိပါတယ်။ တပ်မတော်ဗျူဟာကုန်းရှိရာနေရာနဲ့ ရက္ခိုင့်တပ်တော် AA အဖွဲ့တို့ လှုပ်ရှားရာနေရာနဲ့ လေးမိုင်ဝန်းကျင်သာ ဝေးတယ်လို့ ချင်းလူ့အခွင့်ရေးအဖွဲ့ရဲ့ ထုတ်ပြန်ချက်မှာ ဖော်ပြထားပါတယ်။

စက်တင်ဘာ ၁၄ ရက်နေ့တုန်းကလည်း ပလက်ဝနယ်ဘက်က ဝန်ချောင်းဝကျေးရွာသား သုံးဦးဟာ ရခိုင်ပြည်မြောက်ပိုင်း၊ မြောက်ဦးမြို့နယ်က ဆန်အိုးကျေးရွာကို စက်လှေနဲ့ ဆန်သွားဝယ်ယူပြီး အပြန်လမ်းမှာ စက်လှေနဲ့အတူ လေးမြို့မြစ်ထဲမှာ ပျောက်ဆုံးနေတယ်လို့ ချင်းလူ့အခွင့်ရေးအဖွဲ့က ထုတ်ပြန်ထားပါတယ်။

ဝန်ချောင်းကျေးရွာက အသက်၂၃ နှစ်အရွယ် မောင်လှခိုင်၊ အသက် ၃၂ နှစ်အရွယ် မောင်မောင်ရှေနဲ့ အသက် ၄၀ အရွယ် ဦးမောင်ဆောတို့ ပျောက်ဆုံးနေပေမယ့်၊ လက်နက်ကိုင်အုပ်စုက ဖမ်းဆီးခြင်းလား၊ သဘာ၀ ဘေးအန္တရာယ်ကြောင့်လား ရှင်းရှင်းလင်းလင်းမသိရပါဘူး။

ဒါပေမဲ့ လေးမြို့မြစ်ကြောင်းနေရာတွေဟာ မြန်မာ့တပ်မတော်နဲ့ AA အဖွဲ့တို့ လှုပ်ရှားတဲ့နေရာဖြစ်တယ်လို့ CHRO အဖွဲ့က ဖော်ပြထားပါတယ်။

ပျောက်ဆုံးနေတဲ့ ချင်းတိုင်းရင်းသား ငါးဦးနဲ့ပက်သက်ပြီး မြန်မာ့တပ်မတော်နဲ့ ရက္ခိုင့်တပ်တော် နှစ်ဘက်စလုံးက ဖမ်းဆီးထားတာမရှိဘူးလို့ ငြင်းဆိုကြပါတယ်။

"ပလက်ဝဘက်မှာ ကျနော်တို့ဆီက ဖမ်းဆီးထိန်းသိမ်းစစ်ဆေးတာ ကျနော်သိထားတာတော့ မရှိသေးဘူးဗျ"

တပ်မတော် သတင်းမှန်ပြန်ကြားရေးအဖွဲ့ ဗိုလ်မှူးချုပ် ဇော်မင်းထွန်း ပြောပြသွားတာပါ။

ရခိုင့်တပ်တော် ပြောခွင့်ရ ခိုင်သုခကလည်း …

"ကျနော်တို့ဘက်ကတော့ အဲလိုမျိုး လူမသိသူမသိ ဖမ်းဆီးထိန်းသိမ်းထားတာမျိုး လုံးဝမရှိဘူးဗျ၊ ကျနော်တို့မှာ အဲလိုမျိုးလုပ်ဖို့ ညွှန်ကြားထားတာလည်း လုံးဝမရှိဘူး၊ ဗမာစစ်တပ်ကတော့ ဥပမာရွာသားတွေကို တောထဲမှာတွေရင် တောင်ယာမှာပဲ တွေ့တေ့ွ၊လမ်းမှာပဲ တွေ့တွေ့ သူတို့လိုချင်တဲ့နေရာအထိ လမ်းပြခေါ်သွားတယ်၊ ပြီးလို့ရှိရင် အဲလူတွေကို အခြားလူတွေမသိရင် သူတု့ိက အစဖျောက်လိုက်တယ်"

ချင်းတိုင်းရင်းသားတွေ တစ်ယောက်ပြီးတစ်ယောက် မကြာခဏ ပျောက်ဆုံးနေတာကြောင့် ပလက်ဝဒေသ ချင်းတိုင်းရင်းသားတွေ လုံခြုံမှုကင်းမဲ့နေတယ်လို့ ခူးမီးချင်းမျိုးနွယ်ရေးရာ ပေါင်းစပ်ညှိနှိုင်းရေးကော်မတီ ဥက္ကဋ္ဌ ဦးကျော်ငြိမ်းကပြောပါတယ်။

"အဲလိုဘဲ တစ်ယောက်စ နှစ်ယောက်စ ပျောက်တာ တော်တော်များနေပြီ အဲဒါကိုဘယ်လို့လုပ်ရင် ကောင်းမလဲဆိုပြီး ကျနော်တို့ကခု အဲဒါကိုပြည်နယ်အစိုးရအဖွဲ့လည်း သိပါတယ် ဒီကိစ္စကို ကျနော်တို့က သူတို့ ဘယ်လိုဆောင်ရွက်မလဲဆိုတာကို စောင့်ကြည့်နေတာ အခုက ၊ လုံးဝလုံခြုံမှုမရှိဘူးလို့ ပြောရမှာပေါ့။ ဟိုကလည်းဆွဲ၊ ဒီကလည်းဆွဲ ကျနော်တို့ကကြားမှာ မြေဇာပင်ဖြစ်နေပြီ"

ချင်းလူ့အခွင့်ရေးအဖွဲ့တာဝန်ရှိသူတွေကတော့ အခုလိုချင်းတိုင်းရင်းသားတွေ ပျောက်ဆုံးနေတဲ့အပေါ် အစိုးရအနေနဲ့ တာဝန်ယူဖြေရှင်းပေးသင့်သလို့ လက်နက်ကိုင်အဖွဲ့တွေအနေနဲ့လည်း ဖမ်းဆီးထားရင်ဖမ်းထားကြောင်း ထုတ်ပြန်သင့်တယ်လို့ ပြောပါတယ်။

ချင်းပြည်နယ်အစိုးရအဖွဲ့ တာဝန်ရှိသူတွေကို ဆက်သွယ်မေးမြန်းပေမယ့် လက်ခံဖြေကြားခြင်းမရှိပါဘူး။

အစိုးရတပ်မတော်နဲ့ ရက္ခိုင့်တပ်တော် AA တို့ကြား တိုက်ပွဲတွေကြောင့် ပလက်ဝမြို့နယ်မှာ တစ်နှစ်အတွင်း ချင်းတိုင်းရင်းသား ၁၅ ဦး ပျောက်ဆုံးနေပြီး သတင်းအစအနမရဘူးလို့ ဒေသခံတွေကပြောပါတယ်။

ပလက်ဝမြို့နယ် ကင်းတလင်းကျေးရွာနေ ခူမီးတိုင်းရင်းသားတွေကို ရက္ခိုင့်တပ်တော် AA အဖွဲ့က တိုက်ပွဲဖြစ်ပွားနေ၍ ရွာသားများကို ဘေးကင်းရာခေါ်သွားမယ်လို့ပြောဆိုပြီး  ဘင်္ဂလားဒေ့ရှ်နယ်စပ်ဘက်ကို ခေါ်ဆောင်သွားတာဖြစ်ကြောင်းနဲ့၊ ခြောက်လ အကြာတွင် AA အဖွဲ့က ရွာသား ၅၂ ယောက်ကို အုန်းသီး၀ ကျေးရွာသို့ ပြန်လည်ပို့ပေးခဲ့တာရှိပါတယ်။

(RFAသတင်းထောက် ကိုကျော်လွင်ဦး စုစည်းတင်ပြသည်)

ကွန်မင့်များ (0)
Share
ဆိုက်တခုလုံးသို့