အများပြည်သူ သယ်ယူပို့ဆောင်ရေးကဏ္ဍ အတွက် အတိုင်ပင်ခံ အဓိကထား စဉ်းစားနေ

နေမျိုးထွန်း
2020-05-15
အီးမေးလ်
မှတ်ချက်ပေးပါ
Share
ပုံနှိပ်ပါ

ကပ်ရောဂါကာလမှာ ပြည်သူတွေ သွားရေးလာရေးကိစ္စဟာ အဓိကထား စဉ်းစားရမယ့် ကိစ္စဖြစ်လာတယ်လို့ မေလ ၁၅ ရက် ဒီကနေ့ ကိုရိုနာကာလ အများပြည်သူ သယ်ယူပို့ဆောင်ရေးနဲ့ ပတ်သက်ပြီး YBS ဘတ်စ်ကားတွေရဲ့ စီမံခန့်ခွဲမှုတာဝန်ခံ၊ ဘတ်စ်ကားစီး အလုပ်လုပ်နေသူ၊ မီးရထားတွေမှာ ကိုရိုနာ ကာကွယ်ရေး ဆောင်ရွက်နေသူတို့နဲ့ အွန်လိုင်း ဆွေးနွေးခန်းမှာ ဒေါ်အောင်ဆန်းစုကြည်က ပြောခဲ့ပါတယ်။

“ဘယ်လိုပဲ ပြောပြော သွားရေးလာရေးဟာ အဓိကထား စဉ်းစားရမယ့် ကိစ္စရပ်တစ်ခုဖြစ်တယ်။ လုံးဝ မသွားရဘူး အိမ်ထဲမှာ ထိုင်နေဖို့ ဆိုတာ လုံးဝမဖြစ်နိုင်ဘူး လက်တွေ့မကျဘူး။ ပထမဦးဆုံး စရမယ်ဆို အပြင်မှာထွက် ဈေးဝယ်ရမှာပဲ။ နေ့တဓူဝ စားရေး သောက်ရေးအတွက် နောက်ပြီးတော့ စားရေးသောက်ရေးအတွက် ကိုယ်ဝမ်းစာရှာဖို့ဆိုတာ အလုပ်သွားရမှာပဲ အဲဒါတွေလည်း လိုတယ်။ သွားရေးလာရေး ပို့ဆောင်ရေးနဲ့ ပတ်သက်လို့လည်း တစ်ချိန်လုံး သုံးသပ်နေရမှာ ဒီပုံစံ ဒီပုံစံပဲ ဆက်သွားလို့မရဘူး”


ကိုရိုနာကာလမှာ ကန့်သတ်ထားတဲ့ စည်းမျဉ်းစည်းကမ်းတွေကို ဘယ်အထိ သတ်မှတ်မလဲ ဆိုတာ ဘယ်သူမှ မခန့်မှန်းနိုင်သေးသလို ကျန်းမာရေး ရှုထောင့်ကနေကြည့်မယ် ဆိုရင် မလျှော့သင့်သေးဘူးလို့ ထောက်ပြမှုတွေ ရှိနေပေမယ့် စည်းကမ်းချက်တွေကို အလျှော့အတင်းနဲ့ လုပ်ဆောင်ရမှာဖြစ်တယ်လို့ နိုင်ငံတော်အတိုင်ပင်ခံပုဂ္ဂိုလ်က ပြောခဲ့ပါတယ်။

“ကျန်းမာရေးရှုထောင့်ကနေ ထောက်ပြကြတာတော့ ဒီအချိန်မှာ မလျှော့သင့်ဘဲနဲ့ လျှော့တယ်ပေါ့။ လျှော့တဲ့ဟာက အထောက်အကူ မဖြစ်ဘူး၊ ရောဂါပိုပြီးတော့ ပြန့်ပွားတယ်။ ရေရှည်မှာ ပိုပြီးတော့ စည်းမျဉ်းစည်းကမ်းတွေကို ထားတဲ့အခြေအနေတွေ ဖြစ်သွားနိုင်တယ် ကျွန်မတို့လည်း ဒါကို စဉ်းစားပါတယ်။ ဒါကြောင့်မို့ အလျှော့အတင်းပေါ့။ ဒါက တစ်ချိန်လုံးလုပ်နေရတာပဲ။ ကိုဗစ် အချိန်အခါမှ မဟုတ်ပါဘူး၊ ဘဝက အလျှော့အတင်းပါပဲ။ ကိုဗစ်ကာလာမှာတော့ ပိုပြီးတော့ သိသာတာပေါ့”

နှာခေါင်းစည်းတပ်တာဟာ အပြင်က ရောဂါမကူးစက်ဖို့ ကာကွယ်မှု ပိုများတဲ့အတွက် မဖြစ်မနေ သွားလာနေရတဲ့သူတွေ အနေနဲ့ ကိုယ့်ကိုယ်ကိုယ် ကာကွယ်ဖို့အတွက် နှာခေါင်းစည်း တပ်ကြဖို့လည်း ဒေါ်အောင်ဆန်းစုကြည်က တိုက်တွန်းပါတယ်။

ရန်ကုန်မြို့ဟာ လူဦးရေ ထူထပ်ပြီး ကိုရိုနာဗိုင်းရပ်စ်ပိုး ကူးစက်ခံရသူ အများဆုံးမြို့လည်း ဖြစ်တဲ့အပြင် ဘတ်စ်ကားပေါ်မှာ ခရီးသည် အများအပြား အတူစီးရတဲ့ အခြေအနေဟာ လူပြောများတဲ့ ကိစ္စဖြစ်ပါတယ်။

အစိုးရက ဘတ်စ်ကားတွေမှာလိုအပ်တဲ့ CNG လောင်စာ ထောက်ပံ့ပေးနိုင်မယ်ဆိုရင် ကားအစီးအရေ များများ ထွက်နိုင်တာကြောင့် ရုံးတက် ရုံးဆင်းချိန်တွေမှာ ခရီးသည် ပြန့်သွားပြီး ဘတ်စ်ကားကြပ်တာကို ဖြေလျှော့နိုင်မယ်လို့ YBS စီမံခန့်ခွဲရေးတာဝန်ခံ ဦးအောင်ညီညီမော်က ပြောပါတယ်။

“CNG သာ ရမယ်ဆိုရင် ကားများများ ထွက်လာနိုင်မှာဖြစ်ပါတယ်။ ကားများများထွက်နိုင်ရင် ခရီးသည်က ပိုပြီး ပြန့်သွားမယ့် အနေအထားရှိပါတယ်။ ရုံးတက် ရုံးဆင်းချိန်တွေမှာလည်း ကားတွေကို စိပ်စိပ် လွှတ်ပါတယ်။ ဒါပေမဲ့ ထွက်နိုင်တဲ့ အစီးအရေအတွက်က အင်မတန်နည်းတယ်ပေါ့နော်။ ခရီးသည် နည်းနေသော်ငြားလည်း ကားအစီးရေ လိုက်နည်းသွားတဲ့ အခြေအနေရှိပါတယ်။ တကယ်လို့ အစိုးရကနေ CNG ပြည့်ဝစွာထောက်ပံ့ပေးနိုင်မယ်ဆိုရင် ကားအစီးရေ များများ ဆွဲခိုင်းလို့ရပါတယ်”

အရင်က နေ့စဉ် YBS ဘတ်စ်ကား အစီးရေ လေးထောင်လောက် ပြေးဆွဲခဲ့ပြီး ကိုရိုနာကာလမှာ နှစ်ထောင်လောက်ပဲ ပြေးဆွဲနိုင်တဲ့ အခြေအနေကြောင့် ကားတော်တော်များများက ရပ်ထားရတယ်လို့ ဆိုပါတယ်။

စီးနင်းမယ့် ခရီးသည်အရေအတွက်ကလည်း ၈၀ ရာခိုင်နှုန်းလောက် ကျသွားသလို ယာဉ်မောင်းခ၊ လောင်စာခကြောင့် ယာဉ်ပိုင်ကုမ္ပဏီတွေဘက်က ပုံမှန်ပြေးဆွဲဖို့ အခက်အခဲ ရှိတယ်လို့လည်း ဆိုပါတယ်။

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က မီးရထားကဏ္ဍမှာလည်း တိုးတက်အောင် လုပ်ဆောင်ပြီး ရေရှည်မှာ နိုင်ငံအတွက်လည်း အကျိုးရှိအောင် ကြိုးစားဖို့ တိုက်တွန်းခဲ့သလို ကိုရိုနာကာလမှာ ဘတ်စ်ကားကြပ်တာကို ဖြေလျှော့နိုင်ဖို့ မီးရထား သယ်ယူပို့ဆောင်ရေးကဏ္ဍကို ဖြန့်ပြီး အသုံးပြုကြဖို့လည်း တိုက်တွန်းခဲ့ပါတယ်။

ကွန်မင့်များ (0)
Share
ဆိုက်တခုလုံးသို့