ဘင်္ဂလားဒေ့ရှ်ရဲ့ ပြုမူဆောင်ရွက်ချက် မရိုးသားဘူးလို့ မြန်မာတုံ့ပြန်

နေရိန်ကျော်
2019-10-31
အီးမေးလ်
မှတ်ချက်ပေးပါ
Share
ပုံနှိပ်ပါ
၂ဝ၁၉ ခုနှစ် အောက်တိုဘာ ၃၁ ရက်နေ့က မြန်မာနိုင်ငံဘက်ပြန်လာကြသော ဘင်္ဂလားဒေ့ရှ်ရောက် ရိုဟင်ဂျာဒုက္ခသည်များ။
၂ဝ၁၉ ခုနှစ် အောက်တိုဘာ ၃၁ ရက်နေ့က မြန်မာနိုင်ငံဘက်ပြန်လာကြသော ဘင်္ဂလားဒေ့ရှ်ရောက် ရိုဟင်ဂျာဒုက္ခသည်များ။
Photo: Myanmar Embassy Dhaka

ဘင်္ဂလားဒေ့ရှ်ရောက် ဒုက္ခသည် ၄၆ ယောက် မြန်မာနိုင်ငံဘက်ကို မနေ့က ကြာသပတေးနေ့မှာ သူတို့ သဘောဆန္ဒနဲ့သူတို့ ပြန်လာကြတဲ့အတွက် မြန်မာဘက်က ကြိုဆိုလက်ခံပြီး နေရာချပေးထားတယ်လို့ ဘင်္ဂလားဒေ့ရှ်ဆိုင်ရာ မြန်မာသံရုံးရဲ့ ဖေ့စ်ဘွတ်ခ်စာမျက်နှာမှာ ဖော်ပြထားပါတယ်။ ဒါကြောင့် ပြန်လာတဲ့ ဒုက္ခသည်စုစုပေါင်း ၄ဝဝ နီးပါးရှိသွားပြီလို့ ဆိုပါတယ်။

အခုလို မြန်မာဘက်က ကြေညာတဲ့ ပြန်သွားတဲ့ဒုက္ခသည်အရေအတွက်နဲ့ ပတ်သက်လို့ စိစစ်ပြီးရင် သတင်းထုတ်ပြန်မယ်လို့ ဘင်္ဂလားဒေ့ရှ်နိုင်ငံခြားရေး ဝန်ကြီး အက်ဗ်ဒူမိုမန်က ပြောတဲ့အကြောင်း ဒါကာအခြေစိုက် Independent Online သတင်းမှာ မနေ့ညက ဖော်ပြထားပါတယ်။

ရခိုင်ပြည်နယ်ကို ပြန်သွားတဲ့ဒုက္ခသည်တွေရဲ့အခြေအနေဖြစ်ပေါ်တိုးတက်မှုကို တခုမှ သက်သေမပြ နိုင်သေးဘူးလို့ ဗုဒ္ဓဟူးနေ့က ထုတ်ပြန်တဲ့ ဘင်္ဂလားဒေ့ရှ်နိုင်ငံခြားရေးဌာနရဲ့ကြေညာချက်မှာ ထောက်ပြထားပါတယ်။

ဒါ့အပြင် ရိုဟင်ဂျာတွေ ပြန်လည်ပေါင်းစည်းရေးနဲ့ ဒုက္ခသည်အားလုံး လုံခြုံစိတ်ချစွာ နေရပ်ပြန်နိုင်ရေးနဲ့ ပတ်သက်လို့ ဆောင်ရွက်ရမယ့် တာဝန်ဝတ္တရားကိုရှောင်လွှဲပြီး နိုင်ငံတကာက ထင်ယောင်ထင်မှား ဖြစ်အောင် မြန်မာက လုပ်နေတယ်လို့လည်း ဘင်္ဂလားဒေ့ရှ်ဘက်က စွပ်စွဲလိုက်ပါတယ်။

ဒီစွပ်စွဲချက်နဲ့ ပတ်သက်လို့ ကုလသမဂ္ဂဆိုင်ရာ မြန်မာသံအမတ်ကြီး ဦးဟောက်ဒိုစွမ်းက - ပြန်လာတဲ့ သူတွေကိုလက်ခံမယ်လို့ ပြောထားပြီးသားဖြစ်တဲ့အတွက် အခုလိုအပြစ်ပြောနေတာ မကောင်းဘူးလို့ တုံ့ပြန်ပါတယ်။

“ သူတို့သဘောဆန္ဒနဲ့သူတို့ ဒီဘက်ကလူတွေနဲ့ ဆက်သွယ်ပြီးတော့မှ ပြန်လာကြတာဖြစ်တယ်။ အဲဒါကြောင့် ကျနော်တို့က ဒီလူတွေပြန်လာပါတယ်လို့ ပြောတဲ့ဟာကို အပြစ်တင်ပြီးပြောတဲ့ဟာကတော့ တရားမျှတမှုလဲမရှိဘူး။ ဖြစ်လဲမဖြစ်သင့်ဘူးပေါ့ဗျာ”

ဒီအတောအတွင်းမှာပဲ EU ဥရောပသမဂ္ဂက မြန်မာနိုင်ငံကိုပေးထားတဲ့ လက်နက်ကလွဲလို့ ကျန်တဲ့ ကုန်ပစ္စည်းအားလုံး အခွန်လွတ်ဆိုတဲ့ GSP အထူးကုန်သွယ်ခွင့်ကို ရိုဟင်ဂျာတွေအားလုံး ပြန်ခေါ်ပြီးတဲ့အထိ ဆိုင်းငံ့ထားဖို့ သူ့ရဲ့ဥရောပခရီးစဉ်မှာ တိုက်တွန်းခဲ့တယ်လို့ ဘင်္ဂလားဒေ့ရှ်နိုင်ငံခြားရေးဝန်ကြီး အက်ဗ်ဒူမိုမန်က သတင်းထောက်တွေကို မနေ့က ပြောလိုက်ပါတယ်။

ဘင်္ဂလားဒေ့ရှ်က အခုလိုပြုမူနေတာ အိမ်နီးချင်းနိုင်ငံအနေနဲ့ မလုပ်သင့်ဘူးလို့ မြန်မာသံအမတ်ကြီး ဦးဟောက်ဒိုစွမ်းက ပြောပါတယ်။

“ သူတို့ နိုင်ငံခြားရေးဝန်ကြီး မိုမန်က အီးယူနိုင်ငံတွေနဲ့ သွားတွေတဲ့အခါ ဒီလောက် Genocude လုပ်နေတဲ့ မြန်မာနိုင်ငံကို ခင်ဗျားတို့ ဂျီအက်စ်ပီ အခွင့်အရေးပေးတဲ့ဟာကို ဖြတ်တောက်ပစ်ရမယ်ဆိုပြီး ပြောနေတယ်ဗျာ။အဲတော့ ဘယ်လိုလုပ် ကျနော်တို့အလုပ်လုပ်လို့ အဆင်ပြေမလဲဗျာ။ အိမ်နီးချင်းနှစ်နိုင်ငံ တယောက်နဲ့တယောက် ပြဿနာပြေလည်အောင် ညှိနှိုင်းပြီးလုပ်ရင်တော့ အဆင်ပြေတာပေါ့။ အခုဟာက လိုက်ပြီးတော့ သူတို့က ကျနော်တို့ကို ဒုက္ခရောက်အောင်လုပ်နေတယ် ဆိုတဲ့အခါကျတော့ မရိုးသားမှုတွေကသိပ်များနေတယ် ကျနော်တို့အပေါ်မှာ။ အဲလိုဖြစ်နေတယ်ပေါ့”

ဘင်္ဂလားဒေ့ရှ်ရောက်ဒုက္ခသည်တွေနဲ့ ပတ်သက်လို့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့သဘောထားကတော့ ကိုယ့်ဘက်ကမှန်တာကို လုပ်မယ်၊ တနေ့ကျရင် အမှန်တရားက အနိုင်ရလိမ့်မယ်လို့ သဘောထားပြီး နှစ်နိုင်ငံကြား လုပ်စရာရှိတာ လုပ်ကိုင်နေတယ်လို့ သံအမတ်ကြီး ဦးဟောက်ဒိုစွမ်းကပြောပါတယ်။

ကွန်မင့်များ (0)
Share
ဆိုက်တခုလုံးသို့