ရသေ့တောင်၊ ကျောက်တော်တိုက်ပွဲ အရပ်သား တစ်ဦးသေ၊ သုံးဦးဒဏ်ရာရ

2019-11-22
အီးမေးလ်
မှတ်ချက်ပေးပါ
Share
ပုံနှိပ်ပါ
ရခိုင်ပြည်နယ် ကျောက်တော်မြို့ကို တွေ့ရစဥ်
ရခိုင်ပြည်နယ် ကျောက်တော်မြို့ကို တွေ့ရစဥ်
ဓါတ်ပုံ - မင်းသိန်းအောင်/ RFA

ရခိုင်ပြည်နယ် ရသေ့တောင်နဲ့ ကျောက်တော်မြို့နယ် ကုလားတန်မြစ်ကြောင်းအနီးမှာ မနေ့ကစလို့ တိုက်ပွဲပြင်းထန်တာကြောင့် ဒေသခံ တစ်ဦး သေဆုံးပြီး သုံးဦး ထိခိုက်ဒဏ်ရာရခဲ့ပါတယ်။

ကျောက်တော်မြို့နယ် ကုလားတန်မြစ်ကြောင်းတလျှောက်မှာ ဒီကနေ့မနက်က တစ်နာရီနီးပါးကြာ ဖြစ်ပွားခဲ့တဲ့ တပ်မတော်နဲ့ ရက္ခိုင့်တပ်တော် AA တို့ တိုက်ပွဲကြောင့် ကသစ်တောကျေးရွာက အမျိုးသမီးတစ်ယောက်နဲ့ အသက် ၆၀ အရွယ် အမျိုးသားတစ်ယောက် လက်နက်ကြီးကျည်စ ထိမှန်ခဲ့ပါတယ်။ ဒီအထဲကမှ အဘိုးအိုကတော့ ခြေထောက်ပြတ်သွားပြီး ဒဏ်ရာပြင်းထန်တာကြောင့် စစ်တွေဆေးရုံကို တင်ပို့ထားရတယ်လို့ အမည်မဖော်လိုတဲ့ ဒေသခံ တစ်ဦးက ဆိုပါတယ်။

“အမျိုးသား တစ်ယောက်နဲ့ အမျိးသမီး တစ်ယောက် ဒဏ်ရာရတယ်။ အမျိုးသားကတော့ စစ်တွေကို သွားရတယ်။ မြစ်ထဲကနေပြီး စစ်ရေယာဉ်က အမြှောက်နဲ့ပစ်တာမှာ ထိသွားတယ်လို့ ပြောတယ်။ ခြေထောက်ပြတ်သွားတယ်“

ဘယ်ဘက်ကပစ်လိုက်တဲ့ လက်နက်ကြီးကျည်လဲ ဆိုတာကိုတော့ RFA က သီးခြားအတည်မပြုနိုင်ခဲ့ပါဘူး။

ပလက်ဝနဲ့ ကုလားတန်မြစ်ကြောင်း စီမံကိန်းအတွက် ပစ္စည်းတွေ တင်ဆောင်လာတဲ့ ရေယာဉ်တွေကို AA က တိုက်ခိုက်ခဲ့လို့ တပ်မတော်သားတစ်ဦး ဒဏ်ရာရခဲ့တယ်လို့ အနောက်ပိုင်းတိုင်းစစ်ဌာနချုပ် တိုင်းဦးစီး ဗိုလ်မှူးကြီး ဝင်းဇော်ဦးက ပြောပါတယ်။

“ ဒီနေ့ ခုနှစ်နာရီမှာ ကျောက်တော်နား မရောက်ခင် စည်ပေါက်ဝနားမှာ ပစ္စည်းတင်လာတဲ့ ရေယာဉ်နဲ့ ကမ်းထိုးရေယာဉ် စုစုပေါင်း ခြောက်စီးကို စည်ပေါက်ဝရဲ့ အရှေ့ဘက်ကမ်းကနေပြီး အာပီဂျီနဲ့ပစ်တယ်။ ဒီအတွက် ခုနှစ်နာရီလောက်ကနေ ရှစ်နာရီလောက်အထိ တိုက်ပွဲဖြစ်ပွားခဲ့တယ်။ ရေယာဉ်တွေကတော့ ဘာမှမဖြစ်ဘူး။ ဒါပေမဲ့ လုံခြုံရေးလိုက်သွားတဲ့ တစ်ယောက်တော့ ဒဏ်ရာရခဲ့တယ်“

ပလက်ဝစီမံကိန်းကို အနှောင့်အယှက် မပေးဘဲ ပူးပေါင်းဆောင်ရွက်သွားမယ်လို့ အေအေဘက်က သတင်းထုတ်ပြန်ထားပေမယ့် လက်တွေ့မှာ အခုလို တိုက်ခိုက်မှုတွေကို အေအေဘက်က လုပ်ဆောင်နေတယ်လို့ ဗိုလ်မှူးကြီး ဝင်းဇော်ဦးက ဆိုပါတယ်။

ကုလားမြစ်ကြောင်းတစ်လျှောက်မှာ စစ်ရေယာဉ်တွေလာပြီဆိုရင် တိုက်ခိုက်မှုတွေ အမြဲလိုလိုဖြစ်ခဲ့ပြီး ဒီတစ်ကြိမ်နဲ့ဆို တိုက်ပွဲဖြစ်ပွားတာ သုံးကြိမ်မြောက်ရှိပြီဖြစ်ပါတယ်။

နှစ်ဘက်တိုက်ပွဲတွေကြောင့် အနီးအနားက ပီကောက်ရွာ ဒေသခံတွေလည်း ထိခိုက်ဒဏ်ရာရရှိခဲ့ပြီး နေအိမ်တချို့လည်း ပျက်စီးဆုံးရှုံးခဲ့တယ်လို့ ဒေသခံတွေက ပြောပါတယ်။

မနေ့ကတော့ ရသေ့တောင်မြို့နယ် အမျက်တောင်ကျေးရွာထဲကို လက်နက်ကြီးတွေနဲ့ ပစ်ခတ်ခံရလို့ အသက် ၅၀ ဝန်းကျင်အရွယ် အမျိုးသားတစ်ဦးသေဆုံးပြီး နောက်ထပ်တစ်ဦး ဒဏ်ရာရခဲ့ပါတယ်။

ရသေ့တောင်မြို့နယ် မြောက်ပိုင်းမှာရှိတဲ့ အမျက်တောင် ကျေးရွာထဲကို မနေ့က ညနေ လေးနာရီခွဲလောက်မှာ လက်နက်ကြီးလေးချက် ကျရောက်ပေါက်ကွဲခဲ့တာလို့ ရွာသားတွေက ပြောပါတယ်။

အဲဒီလက်နက်ကြီးတွေကြောင့် အသက် ၄၈ နှစ်အရွယ် ဦးဆန်းသိန်းမောင် ပွဲချင်းပြီး သေဆုံးပါတယ်။ အသက် ၅၀ ဝန်းကျင်အရွယ် ဦးမောင်ခင်ဝင်းကတော့ လက်နက်ကြီးအစ ထိမှန်ဒဏ်ရာရခဲ့တယ်လို့ သိရပါတယ်။

မနေ့က ရွာထဲကိုကျရောက်ပေါက်ကွဲတဲ့ လက်နက်ကြီးတွေကြောင့် နေအိမ်တချို့ပါ ပျက်စီးသွားတယ်လို့ ဆိုပါတယ်။ အမျက်တောင်ကျေးရွာရဲ့ အရှေ့ဘက်မျက်နှာချင်းဆိုင် ချောင်တစ်ဘက်ကမ်းမှာ တပ်မတော် ရေစိုးချောင်း ဗျူဟာ ရှိပါတယ်။

အနောက်ပိုင်းတိုင်းစစ်ဌာနချုပ်တိုင်းဦးစီး ဗိုလ်မှူးကြီး ဝင်းဇော်ဦးက အေအေအဖွဲ့က အမျက်တောင်ရွာကို အကာအကွယ်ယူခဲ့တယ်လို့  ပြောပါတယ်။

“တိုက်ပွဲဖြစ်ကြတာလေ။ အေအေကနေပြီး အဲဒီအမျက်တောင်ကနေ ရေစိုးချောင်းဘက်ကို လှမ်းပစ်တာ။ အဲလိုတော့ သိရတယ်။ တိုက်ပွဲဖြစ်တာကတော့ နာရီဝက်လောက်ကြာတယ်။ ကျွန်တော်ကြိမ်ဖန်များစွာ ပြောထားပြီးသားပါ။ ရွာတွေကိုအခြေခံပြီး လာမလုပ်ပါနဲ့လို့ ပြောထားပြီးသား။ အခုက ရွာထဲကနေ လာပစ်တာကိုး။ဘယ်သူ့ကျည်ကြောင့်မှန်တယ် ဘာညာတော့ ကျွန်တော်လည်း မသိဘူး။ ကျည်မှန်တယ်၊ မမှန်ဘူး ဆိုတာကလည်း ကျွန်တော်လည်း ဂဃနဏ မသိဘူး”

လုံခြုံရေးအရ အမည်မဖော်လိုတဲ့ ကျေးရွာသားတစ်ဦးကတော့  အမျက်တောင်ရွာ အပစ်ခံရတယ်လို့ ပြောပါတယ်။

“ဟိုဘက်မှာ သူတို့အချင်းချင်း အပြန်အလှန် ပစ်ခတ်တယ်လို့ပြောကြတာပဲ။ ကျောက်ခုံပုတ်နဲ့ ရေစိုးချောင်း နှစ်ဘက်ဖြစ်ကြတာ။ အပစ်ခံရတာက အမျက်တောင်ကိုပစ်တာ။ ကျောက်ခုံပုတ်နဲ့ ရေစိုးချောင်းက တောင်နဲ့ မြောက်ဖြစ်တယ်။ ရေစိုးချောင်းဗျူဟာနဲ့ အခုအမျက်တောင်နဲ့က အရှေ့နဲ့အနောက် အဲလိုဖြစ်နေတာ”

ရက္ခိုင့်တပ်တော်(AA)ရဲ့ပြောခွင့်ရသူ ခိုင်သုခက ဒီနေ့မနက်ပိုင်းမှာ အခုလို တုံ့ပြန်ပါတယ်။

“နိုဝင်ဘာလ ၂၁ ရက်နေ့မှာ မနက်ပိုင်းက စပြီးတော့ ရသေ့တောင်မြို့နယ် ရေစိုးချောင်း ဗျူဟာကနေပြီးတော့မှ လက်နက်ကြီးတွေနဲ့ ရမ်းသမ်းပစ်ခတ်နေတဲ့ ဥစ္စာရှိတယ်ဗျ။ သူတို့တစ်နေကုန် ဒေသတွင်းတစ်ခုလုံးကို ရမ်းကားပစ်ခတ်တဲ့အတွက်ကြောင့်မို့လို့ မနေ့ညနေ လေးနာရီလောက်မှာ စစ်တပ်ရဲ့လက်နက်ကြီး ကျည်တစ်လုံးက အမျက်တောင်ရွာကို ကျရောက်ပေါက်ကွဲတယ်လို့ သိရတယ်ဗျ။ ဒါကတော့ ရွာသားတွေကို ဦးတည်ပြီးတော့ တိုက်ခိုက်တာဖြစ်တယ်”

အမျက်တောင်ကျေးရွာမှာ အိမ်ခြေ ၁၀၀ ကျော်ခန့်ရှိပြီး ပြီးခဲ့တဲ့ ဇူလိုင်လပထမပတ်က အနီးအနားမှာနှစ်ဖက် တိုက်ပွဲပြင်းထန်ခဲ့ပြီးနောက် ရွာသားအတော်များများ ထွက်ပြေးခဲ့ကြရသလို နေအိမ် ၁၂ လုံးလည်း မီးရှို့ခံခဲ့ရပါတယ်။

ရွာသားတွေဘက်က- တပ်မတော်က မီးရှို့တယ်လို့ ပြောဆိုချက်ကို တပ်မတော် တာဝန်ရှိသူတွေက အဲဒီစွပ်စွဲချက် မဟုတ်မှန်ကြောင်း ငြင်းဆိုခဲ့ကြပါတယ်။

အခုရွာမှာ အခြေအနေ ပြန်လည်တည်ငြိမ်စပြုလာလို့ ရွာသားအချို့ ပြန်လည်နေထိုင်ခဲ့ပြီးနောက် မနေ့က ရွာထဲကို ပစ်ခတ်ခံခဲ့ရတာလို့လည်း ရွာသားတွေက ပြောပါတယ်။

တစ်နှစ်နီးပါးကြာလာပြီဖြစ်တဲ့ ရခိုင်ပြည်က တိုက်ပွဲတွေကြောင့် အရပ်သား သေဆုံးသူတဖြည်းဖြည်း ပိုတိုးလာနေပြီး စစ်ဘေးရှောင်အရေအတွက်လည်း လျော့မသွားဘဲ တိုးနေဆဲဖြစ်တယ်လို့ သိရပါတယ်။

ကွန်မင့်များ (0)
Share
ဆိုက်တခုလုံးသို့